દવા ખરીદનારાઓ માટે મહત્વપૂર્ણ સમાચાર સામે આવ્યા છે. કેન્દ્રીય આરોગ્ય મંત્રાલયે દવાઓના બિનજરૂરી અને ખોટા ઉપયોગને રોકવા માટે મહત્વનો નિર્ણય લીધો છે. નવા નિયમો અનુસાર હવે કફ સીરપ સહિત ઘણી પ્રકારની સીરપ મેડિકલ સ્ટોરમાંથી ડોક્ટરના પ્રિસ્ક્રિપ્શન વગર ખરીદી શકાશે નહીં.
અત્યાર સુધી અનેક મેડિકલ સ્ટોર પર કેટલીક સીરપ સરળતાથી ઓવર ધ કાઉન્ટર (OTC) ઉપલબ્ધ હતી. જેના કારણે લોકો ઘણી વખત ડોક્ટરની સલાહ વિના દવાઓનો ઉપયોગ કરતા હતા. હવે સરકાર દ્વારા આ પ્રથાને નિયંત્રિત કરવા માટે કડક નિયમો અમલમાં મૂકવામાં આવ્યા છે.
આરોગ્ય મંત્રાલયના જણાવ્યા અનુસાર કેટલીક દવાઓ અને સીરપનો બિનજરૂરી ઉપયોગ આરોગ્ય માટે જોખમી બની શકે છે. ખાસ કરીને કફ સીરપ અને અન્ય કેટલીક દવાઓનો ખોટી રીતે ઉપયોગ થતો હોવાની ફરિયાદો સામે આવી હતી. જેના પગલે હવે મેડિકલ સ્ટોર સંચાલકોને પ્રિસ્ક્રિપ્શન વગર આવી દવાઓ વેચવા પર નિયંત્રણ મૂકવામાં આવ્યું છે.
નવા નિયમો મુજબ ગ્રાહકોને કફ સીરપ અથવા અન્ય નિયંત્રિત સીરપ ખરીદવા માટે ડોક્ટર દ્વારા આપવામાં આવેલ માન્ય પ્રિસ્ક્રિપ્શન રજૂ કરવું પડશે. પ્રિસ્ક્રિપ્શન વિના મેડિકલ સ્ટોર દવા આપશે નહીં.
આ નિર્ણયનો મુખ્ય હેતુ દવાઓના દુરુપયોગને રોકવાનો, દર્દીઓની સુરક્ષા વધારવાનો અને યોગ્ય તબીબી માર્ગદર્શન હેઠળ જ દવાઓનો ઉપયોગ થાય તેની ખાતરી કરવાનો છે.
જો તમે આગામી દિવસોમાં કફ સીરપ અથવા અન્ય કોઈ સીરપ ખરીદવાનું વિચારી રહ્યા હોવ, તો મેડિકલ સ્ટોર પર જતાં પહેલાં ડોક્ટરનું પ્રિસ્ક્રિપ્શન સાથે રાખવાનું ભૂલશો નહીં. નવા નિયમોનું પાલન ન કરવાથી દવા મેળવવામાં મુશ્કેલી પડી શકે છે.
સરકારના આ નિર્ણય બાદ હવે મેડિકલ સ્ટોર અને ગ્રાહકો બંને માટે દવાઓના વેચાણ અને ખરીદીની પ્રક્રિયામાં મહત્વનો ફેરફાર જોવા મળશે.
