અમદાવાદ : 12 ઓગસ્ટ
હવાઈ દળના વડા, એર ચીફ માર્શલ વી.આર. ચૌધરીએ ગાંધીનગર ખાતે આવેલ પ્રતિષ્ઠિત નેશનલ ડિફેન્સ યુનિવર્સિટી (RRU), ની મુલાકાત લીધી હતી. તેમની મુલાકાત દરમિયાન પરસ્પર હિતના ચોક્કસ ક્ષેત્રોમાં R&D ને પ્રોત્સાહન આપવા ઉપરાંત ભારતીય વાયુસેના (IAF) ના કર્મચારીઓ દ્વારા વિવિધ સમકાલીન વિદ્યાશાખાઓમાં શૈક્ષણિક શિષ્યવૃત્તિને વધુ સક્ષમ કરવા માટે RRU સાથે કરાર પર એમઓયુ હસ્તાક્ષર કરવામાં આવ્યા હતા.
સમજૂતી કરાર (એમઓયુ) પર એર વાઇસ માર્શલ રાજીવ શર્મા, સહાયક વાયુ સ્ટાફ (શિક્ષણ) અને પ્રો. આનંદ કુમાર ત્રિપાઠી, પ્રો-વાઈસ ચાન્સેલર આરઆરયુ વતી હસ્તાક્ષર કર્યા. આ પ્રસંગે વાઇસ ચાન્સેલર પ્રોફેસર (ડૉ.) બિમલ એન પટેલ પણ ઉપસ્થિત રહ્યા હતા.
IAF અને RRU વચ્ચેનો સહયોગ IAF કર્મચારીઓને સંરક્ષણ અને વ્યૂહાત્મક અભ્યાસ, આર્ટિફિશિયલ ઇન્ટેલિજન્સ અને સાયબર સિક્યુરિટી, એપ્લાઇડ સાયન્સ, એન્જિનિયરિંગ અને ટેક્નોલોજી અને વિદેશી ભાષાઓમાં વિવિધ અભ્યાસક્રમો લેવા માટે સુવિધા આપશે. એમઓયુ રાષ્ટ્રીય અને આંતરિક સુરક્ષાના ક્ષેત્રમાં સંશોધન અને વિકાસને પણ પ્રોત્સાહન આપશે. યુનિવર્સિટી ભારતીય વાયુસેનાની તાલીમ સંસ્થાઓને પણ માન્યતા આપશે.
આ કાર્યક્રમમાં વાયુસેનાના વડાએ ખાસ એ વાત પર ભાર આપ્યો હતો કે સંરક્ષણ ક્ષેત્રમાં ટેક્નિકલ પ્રગતિને ધ્યાનમાં રાખીને, સૈન્ય અને શિક્ષણવિદ્દો વચ્ચે સહકાર એ એક વિકલ્પ નથી પરંતુ જરૂરિયાત છે. તેઓ આશાવાદી હતા કે આ કરાર આગામી વર્ષોમાં સંરક્ષણ તકનીકના ક્ષેત્રમાં ઘણી નવી સંયુક્ત પહેલ અને તાલમેલ તરફ દોરી જશે.
