Air india hijack threat : હૈદરાબાદના રાજીવ ગાંધી ઈન્ટરનેશનલ (RGIA) એરપોર્ટને એક ઈ-મેઇલ મળ્યો હતો. જેમાં આક્ષેપ કરવામાં આવ્યો હતો કે એક મુસાફરે હૈદરાબાદમાં એર ઈન્ડિયા (AIR INDIA )થી દુબઈની ફ્લાઈટને હાઈજેક કરવાની યોજના બનાવી હતી. પરંતુ તપાસ બાદ જાણવા મળ્યું કે અજાણ્યા એડ્રેસ પરથી મળેલો હાઈજેક ઈમેલ નકલી હતો.
હૈદરાબાદ-દુબઈ ફ્લાઈટના ‘હાઈજેક’ની માહિતી નકલી સાબિત થઈ. હૈદરાબાદના રાજીવ ગાંધી ઈન્ટરનેશનલ (RGIA) એરપોર્ટ પર ધમકીભર્યો ઈમેલ મળ્યો છે. તે ઈમેલમાં લખવામાં આવ્યું છે કે એરક્રાફ્ટ હાઈજેક કરવામાં આવશે, પરંતુ બાદમાં આ માહિતી નકલી હોવાનું જાણવા મળ્યું હતું. એરપોર્ટ ટર્મિનલ મેનેજરને રવિવારે સાંજે એક ધમકીભર્યો ઈમેલ મળ્યો હતો, જેમાં લખ્યું હતું કે હૈદરાબાદ-દુબઈની ફ્લાઈટમાં મુસાફરી કરી રહેલો એક મુસાફર ISI નો એજન્ટ છે અને તે પ્લેનને હાઈજેક કરશે.
પોલીસને મળેલી ફરિયાદ મુજબ ઈમેલમાં એક મુસાફરનું નામ જણાવવામાં આવ્યું હતું, જે પાકિસ્તાનની એજન્સી આઈએસઆઈનો એજન્ટ છે. ઈમેલમાં એવું પણ લખવામાં આવ્યું હતું કે આઈએસઆઈ એજન્ટને હૈદરાબાદ એરપોર્ટ પરથી સપોર્ટ મળ્યો હતો.
ફ્લાઇટ રદ કરાઇ
ઈન્ડિયન એરલાઈન્સનું A-951 એરક્રાફ્ટ રવિવારે રાત્રે 8 વાગ્યે હૈદરાબાદથી દુબઈ માટે ઉપડવાનું હતું. સોમવારે (9 ઑક્ટોબર) આ માહિતી આપતા પોલીસે કહ્યું કે આ માહિતીને કારણે દુબઈ જતી ફ્લાઈટ રદ કરવામાં આવી હતી. તમામ 111 મુસાફરોને વિમાનમાંથી ઉતારવામાં આવ્યા હતા. આ સાથે કેટલાક મુસાફરોને પૂછપરછ માટે ત્યાં રોકી દેવામાં આવ્યા હતા. પૂછપરછ બાદ 3 મુસાફરોને કસ્ટડીમાં લેવામાં આવ્યા છે.
સાયબરાબાદ પોલીસ કમિશ્નરેટના એક વરિષ્ઠ પોલીસ અધિકારીએ જણાવ્યું કે સુરક્ષા તપાસ બાદ અજાણ્યા એડ્રેસ પરથી ઈમેલની માહિતી નકલી હોવાનું જાણવા મળ્યું હતું. તેમણે કહ્યું કે કેસ નોંધવામાં આવ્યો છે અને વધુ તપાસ ચાલી રહી છે. પોલીસ અધિકારીએ કહ્યું કે ઈમેલ મોકલનારને શોધવાના પ્રયાસો કરવામાં આવી રહ્યા છે. અધિકારીએ કહ્યું કે દુબઈ જતી ફ્લાઈટ કેન્સલ કરવામાં આવી હતી અને મુસાફરોને બીજી ફ્લાઈટમાં બેસાડવામાં આવ્યા હતા. બ્યુરો ઓફ સિવિલ એવિએશન સિક્યોરિટી અનુસાર, ધમકી સંદેશની તપાસ કરવા માટે ‘બોમ્બ રિસ્ક એસેસમેન્ટ કમિટી’ બોલાવવામાં આવી હતી અને તમામ પાસાઓ પર વિચાર કરવામાં આવ્યો હતો. આ પછી એરપોર્ટ સત્તાવાળાઓએ જરૂરી ધોરણસરની પ્રક્રિયાને અનુસરીને આગળની કાર્યવાહી હાથ ધરી હતી. એરપોર્ટ અધિકારીઓએ વિમાનમાંથી ત્રણ મુસાફરોને ઉતારીને પોલીસને હવાલે કર્યા હતા.
