સાબરની સૌમ્ય ધરા એવી જગત જનની માં અંબાની પુનિત ધરતી એવા ઉંડવા વિસ્તાર હેલીપેડ ગ્રાઉન્ડ ખેડબ્રહ્મામાં સ્વાધ્યાય પરિવાર દ્વારા રક્ષાબંધન કાર્યક્રમની ઉજવણીનું ભવ્ય આયોજન થઈ રહ્યું છે. પાંડુરંગશાસ્ત્રી આઠવલે પ્રેરિત સ્વાધ્યાય પરિવાર સમાજના પ્રત્યેક વ્યક્તિ સુધી ભગવદ્દ પ્રેમ અને ભગવદ્દ વિચાર લઈ જવાનો ભગીરથ પ્રયત્ન છેલ્લા છ દાયકા થી સાતત્ય પૂર્વક કરતો રહ્યો છે. દાદાજીના સુપુત્રી જયશ્રી દીદી આ રક્ષાબંધન પર્વ નિમિત્તે તા 30 ઓગસ્ટ બુધવારે આદિવાસી વનવાસી ભાઈઓને વિશેષ મળવા માટે અત્રે ખેડબ્રહ્મા આવવાના છે, આ કાર્યક્રમમાં ઉપસ્થિત થવા માટે સાબરકાંઠા, બનાસકાંઠા તથા અરવલ્લી જિલ્લાઓના 7 જેટલા તાલુકાના 610 ગામોમાંથી પાંત્રીસ હજારથી વધુ ભાઈઓ બહેનો ઉપસ્થિત રહેવાના છે.
ખેડબ્રહ્મા હેલીપેડ ગ્રાઉન્ડ પર આ કાર્યક્રમનું આયોજન કરવામાં આવ્યું છે.આજે તા 26 ઓગસ્ટ ના દિવસે મેદાન ખાતે ભૂમિ પૂજન થયું. આજથી મેદાન ઉપર કાર્યક્રમ માટેની પૂર્વ તૈયારીઓ અલગ અલગ વિભાગો દ્વારા શરૂ કરવામાં આવી. વિભાગોમાં મુખ્યત્વે સિવિલ વિભાગ, ઈલેક્ટ્રીક વિભાગ, ઓડિયો વીડિયો વિભાગ, પાર્કિંગ- ટ્રાફિક વિભાગ, પાણી વિભાગ વગેરે વિભાગો પોત પોતાના કાર્યો શરૂ કરી દેશે.
