કાલોલ શહેરમાં પાણીપુરીનો ધંધો કરતા શ્રમિકના વૃન્દાવન સોસાયટીના મકાનમાં શુક્રવારે મોડી સાંજે ઘરમાં ઘૂસીને ઘરફોડ ચોરીને અંજામ આપતા આરોપીને કાલોલ પોલીસે ગણતરીના કલાકોમાં મુદ્દામાલ સાથે ઝડપી પાડીને ઘરફોડીના પાંચ ગુનાઓ ડિટેકટ કર્યા હતા.
પ્રાપ્ત વિગતો અનુસાર કાલોલ શહેરમાં 30 ડીસેમ્બર 2023ના રોજ પાણીપુરીની લારી ચલાવતા શ્રમિક પરિવારના વૃંદાવન સોસાયટીમાં આવેલા મકાનમાં કોઈ અજાણ્યા ઈસમે ઘરમાં ઘૂસીને ઘરફોડ ચોરીનો અંજામ આપતા ચોરી અંગે નોંધાયેલ ગુન્હાની તપાસમાં કાલોલ પોલીસે તપાસના ચક્રો ગતિમાન કરતા પોલીસે મળેલ બાતમી આધારે કાલોલ પોલીસ સ્ટેશનના પો.સબ ઇન્સ. જે.ડી.તરાલે સર્વેલન્સ સ્ટાફના માણસો સાથે કાલોલ બોરૂ ટર્નિંગ પાસે વોચ ગોઠવીને તપાસ કરતા બાતમી મુજબના નંબરવાળી બર્ગમેન ગાડી નં-GJ-17-BS-2222 ઉપર એક ઇસમ બેસી આવતાં તેને ઉભો રખાવી તેનું નામઠામ પુંછતાં તેણે પોતાનું નામ- મોઈન ઉર્ફે ઝફર ઉમરભાઇ કાજી ઉ.વ.૩૦ (રહે. પુરૂસોત્તમનગર સોસાયટી, કાલોલ) તેની અંગઝડતી સહિત સઘન તપાસ કરતા ગાડીની ડીકીમાંથી ચોરીમાં ગયેલ મુદ્દામાલ સહિત અન્ય મુદ્દામાલ પણ મળી આવ્યો હતો. કાલોલ પોલીસે મુદ્દામાલ સાથે ઝડપી લીધેલ આરોપીની અટકાયત કરીને સઘન પૂછપરછ કરતા આરોપીએ શુક્રવારે મોડી સાંજે શહેરના વૃંદાવન સોસાયટીના મકાનમાં કરેલી ઘરફોડીની ચોરી સાથે હાલોલ, કાલોલ અને પાવાગઢ સહિત પાંચ ઘરફોડીની ચોરીના મુદ્દામાલ સાથે ભેદ ઉકેલાયો હતો. આમ કાલોલ શહેરમાં તાજેતરમાં થયેલી ચોરીને પગલે આરોપીને ગણતરીના કલાકોમાં પકડી પાડી પાંચ અનડીટેક્ટ ઘરફોડની ચોરીના ગુન્હો ડીટેકટ કરી પકડાયેલ ઈસમ મોઈન ઉર્ફે ઝફર ઉમરભાઇ કાજી, ઉ.વ.૩૦ (રહે. પુરૂસોત્તમનગર સોસાયટી, કાલોલ) વિરુધ્ધ કાયદેસરની કાર્યવાહી હાથ ધરી છે.
