કચ્છના ભુજના સરહદી વિસ્તારોની સીમા સુરક્ષા દળના વડાએ મુલાકાત લીધી હતી. IPS અભિષેક પાઠક, ઇન્સ્પેક્ટર જનરલ ગુજરાત ફ્રન્ટિયરે ભુજ સેક્ટરના આગળના વિસ્તારોની મુલાકાત લીધી હતી. તેમજ આઈજી BSF ગુજરાત ફ્રન્ટિયર તરીકેનો ચાર્જ સંભાળ્યા બાદ ખાડી વિસ્તાર અને હરામી નાળાની પ્રથમ મુલાકાત હતી.
ભુજ સેક્ટરની ત્રણ દિવસીય મુલાકાત દરમિયાન, પાઠકે વર્તમાન સુરક્ષા પરિદ્રશ્ય, વર્તમાન ઓપરેશનલ અને વહીવટી તૈયારીઓ અને કચ્છ સરહદે સામનો કરી રહેલા વિવિધ સુરક્ષા પડકારોનો સામનો કરવા માટે ચાલી રહેલા પ્રયાસોની સમીક્ષા કરી હતી. તેમણે BSF ફિલ્ડ કમાન્ડરો, જિલ્લા વહીવટી અધિકારીઓ અને અન્ય મુખ્ય હિતધારકો સાથે પણ વાતચીત કરી હતી. જેમાં મુખ્યત્વે હાલના સુરક્ષા ઈન્ફ્રાસ્ટ્રક્ચરની સમીક્ષા કરવા અને તેને અપગ્રેડ કરવા પર ધ્યાન કેન્દ્રિત કરવામાં આવ્યું હતું.
વિવિધ સરહદી ચોકીઓ પર આગળ તૈનાત સૈનિકોને સંબોધતા, IG BSF ગુજરાતે તેમની ફરજો ખંતપૂર્વક નિભાવવા અને મુશ્કેલ અને પડકારજનક પરિસ્થિતિઓમાં આપણા દેશની સરહદોની રક્ષા કરવા બદલ તેમની પ્રશંસા કરી હતી.
