દક્ષિણ ગુજરાતમાં સતત વરસી રહેલા ભારે વરસાદે સામાન્ય જનજીવનને ગંભીર અસર પહોંચાડી છે. છેલ્લા બે દિવસથી મેઘરાજાએ દક્ષિણ ગુજરાતના અનેક જિલ્લાઓમાં અવિરત બેટિંગ કરતાં નર્મદા, નવસારી, વલસાડ, સુરત અને તાપી જિલ્લામાં પૂર જેવી સ્થિતિ સર્જાઈ છે. નીચાણવાળા વિસ્તારોમાં પાણી ભરાઈ જતાં અનેક માર્ગો બંધ થઈ ગયા છે, જ્યારે નદીઓ ભયજનક સપાટીએ વહેતાં પ્રશાસન પણ એલર્ટ મોડમાં આવી ગયું છે.
નર્મદા જિલ્લામાં ભારે વરસાદના કારણે એક મહત્વપૂર્ણ ડાયવર્ઝન ધોવાઈ જતાં સાત ગામોનો મુખ્ય માર્ગ સાથેનો સંપર્ક તૂટી ગયો છે. માર્ગ વ્યવહાર સંપૂર્ણપણે ખોરવાઈ જતા સ્થાનિક લોકોને રોજિંદા જીવનમાં ભારે મુશ્કેલીઓનો સામનો કરવો પડી રહ્યો છે. તંત્ર દ્વારા વૈકલ્પિક વ્યવસ્થા ઉભી કરવાની કામગીરી શરૂ કરવામાં આવી છે, જ્યારે અસરગ્રસ્ત વિસ્તારોમાં સતત નજર રાખવામાં આવી રહી છે.
દક્ષિણ ગુજરાતમાં છેલ્લા 24 કલાક દરમિયાન અનેક વિસ્તારોમાં અતિભારે વરસાદ નોંધાયો છે. ઉમરગામ વિસ્તારમાં અંદાજે 35 ઇંચથી વધુ વરસાદ નોંધાતા અનેક વિસ્તારો જળમગ્ન બન્યા છે. વલસાડ, નવસારી અને આસપાસના વિસ્તારોમાં પણ અત્યંત ભારે વરસાદને કારણે રસ્તાઓ નદીમાં ફેરવાઈ ગયા છે. પૂર્ણા, અંબિકા, કાવેરી સહિતની નદીઓ સતત ઊંચી સપાટીએ વહેતાં નીચાણવાળા વિસ્તારોમાં પાણી ઘૂસી જવાની સ્થિતિ સર્જાઈ છે. અનેક ગામોમાં લોકોને સલામત સ્થળે ખસેડવાની કામગીરી હાથ ધરવામાં આવી છે.
ભારે વરસાદની સીધી અસર રેલવે સેવાઓ પર પણ જોવા મળી છે. પશ્ચિમ રેલવેના અમદાવાદ-મુંબઈ રૂટ પર ટ્રેક પર પાણી ભરાવા અને સુરક્ષાના કારણોસર 7 ટ્રેનો રદ કરવામાં આવી છે, જ્યારે કેટલીક ટ્રેનોને ટૂંકા માર્ગે દોડાવવામાં આવી રહી છે અથવા મોડેથી ચલાવવામાં આવી રહી છે. નવસારી રેલવે સ્ટેશન પર મોટી સંખ્યામાં મુસાફરો ટ્રેનની રાહ જોતા અટવાઈ ગયા હતા. લાંબા સમય સુધી ટ્રેન સેવા પ્રભાવિત રહેતાં મુસાફરોને ભારે હાલાકીનો સામનો કરવો પડ્યો હતો.
બીજી તરફ સુરત શહેરમાં પણ વરસાદી કહેર યથાવત રહ્યો છે. શહેરની મીઠી ખાડીમાંથી એક અજાણ્યા વ્યક્તિનો મૃતદેહ મળી આવતાં સ્થાનિક વિસ્તારમાં ચકચાર મચી ગઈ છે. ઘટનાની જાણ થતાં પોલીસ અને ફાયર વિભાગની ટીમ તાત્કાલિક સ્થળ પર પહોંચી હતી અને મૃતદેહને બહાર કાઢી પોસ્ટમોર્ટમ માટે મોકલવામાં આવ્યો છે. મૃતકની ઓળખ તેમજ મૃત્યુનું ચોક્કસ કારણ જાણવા પોલીસે તપાસ શરૂ કરી છે.
હવામાન વિભાગે આગામી 24થી 48 કલાક દરમિયાન દક્ષિણ ગુજરાતના અનેક જિલ્લાઓમાં હજુ પણ ભારેથી અતિભારે વરસાદની આગાહી વ્યક્ત કરી છે. નદી કાંઠાના વિસ્તારોમાં રહેતા લોકોને સાવચેત રહેવા, બિનજરૂરી મુસાફરી ટાળવા તેમજ સ્થાનિક તંત્ર દ્વારા આપવામાં આવતી સૂચનાઓનું પાલન કરવા અપીલ કરવામાં આવી છે. NDRF, SDRF, ફાયર બ્રિગેડ અને સ્થાનિક વહીવટી તંત્રને પણ સંભવિત આપત્તિનો સામનો કરવા માટે હાઈ એલર્ટ પર રાખવામાં આવ્યા છે.
રાજ્યના અનેક જિલ્લાઓમાં વરસાદી સ્થિતિને ધ્યાનમાં રાખીને શાળાઓમાં રજાઓ જાહેર કરવી, બચાવ કામગીરી તેજ કરવી અને સતત મોનીટરીંગ કરવું જેવી કામગીરી ચાલુ છે. જો આગામી દિવસોમાં વરસાદનું જોર યથાવત રહેશે તો દક્ષિણ ગુજરાતના વધુ વિસ્તારોમાં જનજીવન પર તેની વ્યાપક અસર જોવા મળી શકે છે.
