રામાયણના ભવ્ય ગાથા દર્શાવતી પ્રભાસ અને કૃતિ સેનન સ્ટારર આદિપુરૂષની રિલીઝનું કાઉન્ટડાઉન શરૂ થઈ ગયું છે. ત્યારે 16 જૂને ફિલ્મ રિલીઝ થશે. પરંતુ તેના 10 દિવસ પહેલા મેકર્સે દર્શકોને મોટી ભેટ આપી છે. આ ફિલ્મની આતૂરતાપૂર્વક રાહ જોઈ રહેલા દર્શકો માટે ફાઈનલ ટ્રેલર રિલીઝ કરી દેવામાં આવ્યું છે, જેમાં દમદાર એક્શનની ઝલક તો જોવા મળી રહી છે. પરંતુ સૈફ અલી ખાન ના પાત્રથી તમારી નજર હટી શકશે નહીં.
આદિપુરૂષના નવા ટ્રેલરની શરૂઆત થાય છે રાવણ બનેલા સૈફ અલી ખાન જે જાનકીનું હરણ કરવા માટે આવે છે. બસ આ સીનમાં દરેકની નજર સૈફ પર ટકે છે અને તમે તેના પરથી નજર હટાવી શકશો નહીં. આ ટ્રેલરમાં અધર્મ પર ધર્મના વિજયનો સાર દેખાડવામાં આવ્યો છે. તો આદિપુરૂષના મેકર્સે નક્કી કર્યું છે કે ફિલ્મની રિલીઝ બાદ દરેક થિએટરમાં એક સીટ માત્ર હનુમાનજી માટે રિઝર્વ રાખવામાં આવશે, આ ટિકિટ વેચવામાં આવશે નહીં. તેનું કારણ છે કે માન્યતા પ્રમાણે જ્યાં શ્રીરામનો ઉલ્લેખ થશે ત્યાં જરૂર હનુમાનજી હોય છે, જેથી આ ફિલ્મ દરમિયાન એક સીટને રિઝર્વ રાખવામાં આવી છે.
આ ફિલ્મ બનાવવા માટે મોટી રકમ ખર્ચ કરવામાં આવી છે. ઉલ્લખનીય છે કે આદિપુરૂષ 500 કરોડના બજેટમાં બની છે અને મોટા ભાગનો ખર્ચ ફિલ્મના ગ્રાફિક્સમાં થયો છે, જેને ભવ્ય અને રીયલ દેખાડવા માટે પાણીની જેમ પૈસા વાપરવામાં આવ્યા છે. તો ટ્રેલરથી આ મહેનત સ્પષ્ટ જોવા મળી રહી છે. ફિલ્મના ડાયરેક્ટર ઓમ રાઉત છે, જેમણે આ પહેલા તાન્હાજી જેવી સુપરહિટ ફિલ્મ બનાવી હતી.
