મુંબઇમાં 26 નવેમ્બરના રોજ થયેલો આતંકી હુમલો.જે આજ સુધી કોઇ ભુલી શક્યું નથી. એ 26 નવેમ્બરનો દિવસ સૌનો કાળ હતો. ત્યારે ફરી એકવાર મુંબઇ પોલીસને આવા આતંકી હુમલાની ધમકી આપતો ફોન આવ્યો હતો. મુંબઈના ટ્રાફિક કંટ્રોલ રૂમને ધમકી મળી કે યુ.પી.ના CM યોગી આદિત્યનાથ અને PM નરેન્દ્ર મોદીની સરકાર તેમના નિશાના પર છે. મુંબઈ પોલીસના જણાવ્યા અનુસાર, આરોપીએ 26/11 જેવા આતંકવાદી હુમલાની ધમકી પણ આપી છે. પોલીસે આ મામલે IPCની કલમ 509(2) હેઠળ અજાણ્યા વ્યક્તિ વિરુદ્ધ કેસ નોંધ્યો છે.
મુંબઈના ટ્રાફિક કંટ્રોલ રૂમને કોઈ અજાણ્યા વ્યક્તિ દ્વારા ધમકી આપવામાં આવી છે કે યોગી આદિત્યનાથની સરકાર અને મોદી સરકાર નિશાના પર છે. ધમકી આપનાર આરોપીએ મેસેજમાં વધુમાં જણાવ્યું હતું કે કેટલીક જગ્યાએ કારતુસ અને એકે 47 છે. આ સાથે મુંબઈમાં 26/11ના હુમલાનું પુનરાવર્તન કરવાનું પણ મેસેજમાં કહેવામાં આવ્યું છે. આ બાબતને ગંભીરતાથી લઈને મુંબઈ પોલીસ અજાણ્યા વ્યક્તિને શોધી રહી છે. આ કિસ્સામાં, વર્લી પોલીસ સ્ટેશનમાં એક અજાણ્યા વ્યક્તિ વિરુદ્ધ કેસ નોંધવામાં આવ્યો છે.
ત્યારે PTI ભાષાના અહેવાલ મુજબ, 9 જુલાઈના રોજ, પોલીસને યુપીના 112 નંબર પર ધમકીનો કોલ મળ્યો હતો. આ કોલમાં વડાપ્રધાન નરેન્દ્ર મોદી અને યુપીના CM યોગી આદિત્યનાથને જાનથી મારી નાખવાની ધમકી આપવામાં આવી હતી. આ મામલામાં દેવરિયા જિલ્લાની કોતવાલી પોલીસે એક વ્યક્તિની અટકાયત કરી છે, આરોપ છે કે તેણે દારૂ પીને યુપી-112 નંબર પર ફોન કર્યો હતો. પોલીસે તરત જ તેના ફોન નંબરના આધારે આરોપીનું લોકેશન ટ્રેસ કર્યું અને તેને કસ્ટડીમાં લીધો. આરોપી યુવક ગોરખપુરનો રહેવાસી છે, પોલીસે આ જાણકારી 10 જુલાઈએ આપી હતી. આ મામલે દેવરિયા પોલીસ સ્ટેશનના ઈન્ચાર્જ ઈન્સ્પેક્ટરે જણાવ્યું કે આ વ્યક્તિએ પોતાને દેવરિયા જિલ્લાના કોતવાલી પોલીસ સ્ટેશન હેઠળના શહેરની ભુજૌલી કોલોનીનો રહેવાસી અરુણ કુમાર ગણાવ્યો હતો. આ પછી તેણે ધમકી આપી કે તે પીએમ મોદી અને સીએમ યોગીને મારી નાખશે.
આ અંગે માહિતી આપતાં સ્ટેશન ઈન્ચાર્જે કહ્યું કે તરત જ પોલીસને મોબાઈલ નંબરનું લોકેશન જાણવા મળ્યું, તો તેનું લોકેશન ગોરખપુર જિલ્લાના હરપુર બુધાતના દેવરાડ ગામનું હોવાનું બહાર આવ્યું. તેણે જણાવ્યું કે પોલીસ સંબંધિત સ્થળે પહોંચી અને આરોપી ફોન કરનારને કસ્ટડીમાં લીધો. આરોપીનું નામ સંજય કુમાર છે. તેમની ઉંમર 45 વર્ષની છે. સ્ટેશન ઈન્ચાર્જે જણાવ્યું કે આરોપીએ દારૂના નશામાં આ કૃત્ય કર્યું. તેમણે એમ પણ કહ્યું કે વિવિધ પાસાઓને ધ્યાનમાં રાખીને પોલીસે આગળની કાયદેસરની કાર્યવાહી શરૂ કરી છે. પોલીસ દ્વારા દેવરિયા કોતવાલી ખાતે આરોપીની પૂછપરછ કરવામાં આવી હતી અને તેની સામે FIR પણ નોંધવામાં આવી હતી.
