પાટણ : 5 સપ્ટેમ્બર
આજરોજ શિક્ષકદિન નિમિતે રાજયકક્ષાના માનનીય મંત્રી વિનોદ મોરડીયા પાટણના પ્રવાસે છે. તેઓના અધ્યક્ષ સ્થાને હેમચંદ્રાચાર્ય ઉત્તર ગુજરાત યુનિવર્સીટીનાં રંગભવન ખાતે શ્રેષ્ઠ શિક્ષક પારિતોષિક વિતરણ સમારોહનું આયોજન કરવામાં આવ્યુ હતુ. આ કાર્યક્રમમાં તાલુકા/જિલ્લા કક્ષાના શ્રેષ્ઠ શિક્ષકો તેમજ વિદ્યાર્થીઓનું મંત્રીનાં હસ્તે સન્માન કરવામાં આવ્યું હતુ. કાર્યક્રમ બાદ મંત્રી રાણકીવાવની મુલાકાતે ગયા હતા ત્યારબાદ સર્કીટ હાઉસ ખાતે મંત્રીની અધ્યક્ષતામાં પાટણ જિલ્લાની નગરપાલિકાઓની સમીક્ષા બેઠકનું આયોજન કરવામાં આવ્યુ હતુ.
પાટણના સર્કિટ હાઉસ ખાતે આયોજીત સમીક્ષા બેઠકમાં પાટણ જિલ્લાની નગરપાલિકાઓની કામગીરીની સમીક્ષા કરવામાં આવી હતી. આ સમીક્ષા બેઠકમાં મુખ્યત્વે ચોમાસાના કારણે નુકસાન પામેલ રસ્તાઓના સમારકામ અને રસ્તા રિસરફેસીંગની કામગીરી, રખડતા ઢોર પકડવાની કામગીરી, દબાણ દુર કરવાની કામગીરી, તેમજ પાણી પુરવઠા યોજના અને નલ સે જલ યોજના અંતર્ગત થયેલ કામગીરી અને વિવિધ યોજનાઓ અંતર્ગત થયેલ કામગીરીની સમીક્ષા કરવામાં આવી હતી. સમીક્ષા બેઠક દરમિયાન મંત્રીએ વિવિધ કામગીરીના સંલગ્ન અધિકારીઓને યોગ્ય સુચનો પણ કર્યા હતા. જ્યારે સરકારની ફ્લેગશીપ યોજનાઓ સત્વરે લાભાર્થીઓ સુધી પોહચે તે માટે કામગીરી કરવા જરૂરી સૂચનો કર્યા હતા. આજની આ સમીક્ષા બેઠકમાં પાટણ જિલ્લા નગરપાલિકાઓના અધિકારીઓ હાજર રહ્યા હતા.
